Хагарч эвдэрч цуурсан шаардлага хангахгүй, хүүхдүүд бэртэж гэмтэхээр тоглоомын талбайг шинэчлэх ажлыг эхлүүлжээ. Чингэлтэй дүүрэгт нийт 83 тоглоомын талбай байгаагаас 15 гаруй хувьд эвдрэл гэмтэлтэй, стандартын шаардлага хангаагүй, хүүхдүүд бэртэж гэмтэх өндөр эрсдэлтэй болжээ.

Эдгээр 83 тоглоомын талбайг нэг стандартад оруулж, хүүхдэд ээлтэй, аюулгүй байх материал хийцлэлээр хийгдсэн, хамгийн гол нь бүх насны хүүхдүүдийн хэрэгцээнд нийцсэн байхаар шийдэж байна.

Харин шинэчлэгдсэн тоглоомын талбайг цаашид эвдрэл, гэмтэл үүсгүүлэхгүй байх дээр анхаарч арчлалт хамгаалалтыг тухайн хэсгийн СӨХ-той хамтран гэрээ байгуулж хариуцуулахаар төлөвлөж байгааг НИТХ-ын төлөөлөгч, Чингэлтэй дүүргийн Засаг дарга Н.Мандуул мэдээлэв. Тэрбээр “Цаашид иргэд, хүүхэд залууст зориулсан ногоон байгууламж, амрах, тоглох талбай зэргийг нэг стандартад, хэрэгцээнд нийцсэн байхаар чиглэл барьж ажиллана” гэсэн юм. Дүүргийн Засаг дарга холбогдох албаны хүмүүстэй хүүхдийн тоглоомын талбайг шинэчлэх асуудалд анхаарч, эвдрэл гэмтэлтэй тоглоомын талбайг ийнхүү шинэчлэхээр болсон нь энэ юм байна.