Гал түймрийн улмаас байшин нь шатсан 6 хүүхэдтэй гэр бүлд Улсын аварга О.Хангай байшингаа засварлахад нь дотор заслын материалуудыг нь авч өгөхөө мэдэгдсэн бол Улсын заан Б.Бат-Өлзий Тусгаар тогтнолын өдөрт зориулсан барилдааны бай шагналаа хандивлана гэж байв. Өнөөдөр болж байгаа Үндэсний эрх чөлөө тусгаар тогтнолоо сэргээн мандуулсны 113 жилийн ойд зориулсан “Ерөнхийлөгчийн нэрэмжит цом”-ын төлөөх шилдэг 128 бөхийн уламжлалт барилдаанд Б.Бат-Өлзий нэгийн даваанд Аймгийн арслан Д.Цоггэрэлд өвдөг шороодсон юм.

Тэрбээр барилдааны дараа "Галд байшингаа алдсан зургаан хүүхэдтэй айлд бай шагналаа хандивлана гэж бодож байсан ч нэгийн даваанд уначихлаа. Хэлсэн ёсоороо очиж, хандив өргөнө" гэж байв.

Тэгвэл Улсын заан Б.Бат-Өлзий хэлсэн амандаа хүрч байшин нь шатсан 6 хүүхэдтэй гэр бүлд сэтгэлийн хандив болох 1 сая төгрөгийг өгчээ.