Энэ мэдээ хуучирсан буюу 2020/10/23-нд нийтлэгдсэн мэдээ болно.

Эмийн хяналтад нэгдсэн цахим программ хангамж нэвтрүүлнэ

Ангилал
Улс төр
Огноо
Унших
3 минут 7 секунд

УИХ-ын чуулганы нэгдсэн хуралдаанаар Эм, эмнэлгийн хэрэглэгдэхүүний тухай хуулийн шинэчилсэн найруулгын төслийг хэлэлцэх эсэх хэлэлцүүлгийг хийж байна.

Хуулийн төслийг Эрүүл мэндийн сайд Т.Мөнхсайхан танилцууллаа. Төсөлд эм, эмнэлгийн хэрэглэгдэхүүний  чанар, аюулгүй байдлыг хангах зорилгоор эмнэлгийн тусламж үйлчилгээнд хэрэглэх эмнэлгийн хэрэглэгдэхүүнийг эрсдэлээр ангилан бүртгэх шинэ зохицуулалтыг оруулжээ. Мөн эм, уламжлалт эм, малын эмийг сонгох, бүртгэх зарчим, шалгуур болон эм үйлдвэрлэгч, импортлогчийн эмийн чанар, аюулгүй байдалд хүлээх хариуцлагыг нэмж, эмийн хяналтад нэгдсэн цахим программ хангамж нэвтрүүлэхээр тусгажээ.

Эмийн зохистой хэрэглээ, сонголт, жор бичилтийг сайжруулах зорилгоор эмийн жорыг заавар удирдамжид үндэслэн бичих, цахим жор хэрэглэх, эм хангамжийн байгууллага, эмч төлөөлөгч нарын эмийг зах зээлд таниулах, нэвтрүүлэх  үйл ажиллагааны зохицуулалтыг боловсронгуй болгохоор тусгасан байна. Энэ хүрээнд иргэд эм гэж төөрөгдөн хэрэглэдэг эрүүлжүүлнэ, тураана, таргалуулна гэсэн хэт дөвийлгөсөн зар сурталчилгаатай бүтээгдэхүүний зохицуулалт сайжирна гэж Т.Мөнхсайхан сайд дурдлаа.  Эмийн хангамж, хүртээмж, иргэдийн эм худалдан авах боломжийг нэмэгдүүлэхээр эмийн үнийн ил тод байдлыг хангах, гадаад, дотоодын жишиг үнийг нэвтрүүлэх, түгээлтийн шат бүрт эмийн үнийг зохицуулах, иргэд шуудан илгээмжээр эмийг хүлээн авах эрх зүйн орчныг шинэчлэхээр тусгалаа.

Хуулийн төслийн хэлэлцүүлгийн үеэр УИХ-ын гишүүн Ц.Даваасүрэн ДЭМБ-ын 2013 онд хийсэн судалгаагаар Монгол Улсад борлуулж буй эмийн үнэ дэлхийн дунджаас хэт үнэтэй, 3 эм тутмын 1 нь хуурамч байна дүгнэлт гарсныг онцоллоо. Тэрбээр, “Эмч өвчтөнд зөв эм бичиж өгсөн эсэхийг хянадаг систем дэлхийн нийтэд бий. Энэ тогтолцоо манайд маш сул” хэмээн шүүмжиллээ.

ДЭМБ-аас манай улсад 2013, 2017 онд судалгаа хийжээ. 2013 онд эмийн үнэ дэлхийн зах зээлээс 5-6 хувь, 2017 онд  3-5 дахин илүү үнэтэй байна гэсэн  удаа судалгаа байгааг ЭМЯ-ны удирдлагууд онцолж байлаа. 3 эм тутмын 1 нь хуурамч гэдэг нь Монгол Улсад бүртгэгдээгүй эм оруулж ирсэн байна гэсэн үг хэмээн тайлбарлав.

Харин УИХ-ын гишүүн Л.Энх-Амгалан  хөнгөлөлттэй эмийн жагсаалтад орсон эмийн 30 хувь нь эзэндээ хүрэхгүй байна хэмээв. Тэрбээр, “Хуульд эмийн бие даасан агентлаг байгуулахаар тусгасан байна. Агентлаг хөнгөлөлттэй эмийг зөв хэрэглэгчдэд нь хүргэдэг, иргэдэд үйлчилдэг байх ёстой. Хэн нэгэн хүний эрх ашгийг хамгаалдаг агентлаг болж болохгүй” гэлээ.

Сурагчид Онцгой байдлын албаны музейтэй танилцлаа
Сурагчид Онцгой байдлын албаны музейтэй танилцлаа
 
Төрийн албан хаагчдын цалин ирэх даваа гарагаас 100-150 мянган төгрөгөөр нэмэгдэнэ
Төрийн албан хаагчдын цалин ирэх даваа гарагаас 100-150 мянган төгрөгөөр нэмэгдэнэ
Энэ мэдээ хуучирсан буюу 2020/10/23-нд нийтлэгдсэн мэдээ болно.