БНСУ-д амиа хорлох үзэгдлийн хувь дэлхийд дээгүүр бичигддэг байна. Иймд Сөүл хотноо  ‘’Hyowon Healing’’ хэмээх төв шинээр нээгджээ.

Сэтгэл гутралд орсон, амьдрал утгагүй мэт бодогдож, үхэх бодол толгойд эргэлдэх болсон нэгэн өөрийн хүсэлтээр энэ төвд ирж үйлчлүүлдэг байна. Эхлээд үйлчлүүлэгчийн зургийг нь авч хар туузаар чимэглээд, гашуудлын хувцас өмсгөнө. Дараа нь тэд үлдэгсэдэд зориулж сүүлчийн захидлаа бичдаг байна. Захидлаа хамт байгаа нөхдөдөө уншиж өгөхдөө ихэнх үйлчлүүлэгчид чанга уйлдаг гэнэ.

Үүний дараа тэдэнд амьдрал ямар үнэ цэнтэйг харуулсан баримтат кино үзүүлж, хорт хавдар туссан нэгний энэ орчлонд амьд байхын учир утгын талаарх яриаг сонсгодог гэнэ.

Дараа нь зургаа тэврэн шарилын хайрцаганд хэвтэх үед хар хувцастай хүн ирж тагийг нь хаана. 10 минут орчим чив чимээгүй, харанхуй орчинд өөрийгөө юу хийж байгааг ухаарч, өнгөрсөн амьдралаа эргэж нэг санаж, яагаад ийм байдалд орсоноо эргэцүүлэн боддог байна. Энэ 10 минут үхэхийг хүссэн хэнийг ч өөрчилж чаддаг гэнэ.

Тус төвөөр үйлчлүүлсэн нэгэнд дахиж үхэх бодол орж ирдэггүй бөгөөд дахин төрсөн мэт нөлөөлж, олон ч хүнийг зөв зам руу нь зааж чиглүүлсэн судалгаа байгаа юм. Харин "Дэлхийн эрүүл мэндийн байгууллага"-ийн судалж тогтоосноор манай улсад жилд 413 хүн амиа хорлодог ба энэ оны амиа хорлолтын индексээр 183 орноос 43-т бичигджээ.