Орхон голд 46 настай эмэгтэй живж амиа алджээ. Тодруулбал, Өвөрхангай аймгийн Хархорин сум, Орхон багийн Нарийн ам гэдэг газарт “Орхон голын усанд хүн живчихлээ” гэх дуудлагыг долдугаар сарын 18-ны өдрийн 15:55 цагт Онцгой байдлын газарт ирүүлжээ.

Тус аймгийн Онцгой байдлын газрын 45 дугаар ангийн алба хаагчид очиход тус сумын харьяат иргэн Ц голд живсэн байжээ. Эрэн хайх ажиллагааг зохион байгуулж 16:32 цагт осолдсон газраас зүүн зүгт 30 метрт усны мандлаас тухайн иргэний цогцсыг олж, аймгийн цагдаагийн газарт шилжүүлэн өгсөн байна.