Өнгөрсөн даваа гарагт хуралдсан МАН-ын Бага хурлаар энэ удаагийн сонгуульд нэр дэвшигчдээ тодруулсан билээ. Тус намаас жагсаалтаар нэр дэвшигчдийг Токиогийн их сургуулийн докторант Г.Лувсанжамц тэргүүлсэн.

Тэгвэл түүнийг Ардчилсан намын Нарийн бичгийн дарга Н.Гансүх мэтгэлцээнд дуудлаа. Тэд "Улаанбаатар хотын өнөөгийн асуудлууд ба ойрын хугацааны бодит шийдэл" сэдвээр мэтгэлцэх аж. Н.Гансүх мэдэгдэхдээ,

"Намайг Норовсамбуугийн Гансүх гэдэг 34 настай, 3 хүүхдийн аав, эрх зүйч мэргэжилтэй, Төрийн удирдлагын доктор зэрэгтэй (Ph.D), Ардчилсан намын Нарийн бичгийн дарга албан тушаалтай жирийн нэг залуу хүн.

Монгол ардын нам хэмээх 104 жилийн түүхтэй намын бодлогоор дэвшүүлж УИХ гишүүн шууд болох гэж буй танд баяр хүргэхийн зэрэгцээ Монголын ард түмэн залуучуудаас сурч мэдсэнээ хэрэгжүүлж, өөрчлөлт шинэчлэл хийхийг итгэж хүлээж буйг давхар хариуцлагатайгаар сануулж байна.

Залуу хүн учраас нэгнээ харлуулж худлаа гүтгэх гэсэнгүй. Япон улсад сурч мэдсэн мундаг мэдлэг боловсролтой таныг "цэнхэр дэлгэц"-ээр Улаанбаатар хотын асуудал дээр шийдэл бодлого ярьж нээлттэй мэтгэлцэхийг урьж байна. Хүлээн авна гэдэгт итгэж байна. Нуугдаж суух биш хамтдаа гарц шийдэл ярилцъя.

Мэтгэлцээн болох газар тавдугаар сарын 24-26-ны хооронд таны хүссэн цагт, телевизэд шууд мэтгэлцье" гэжээ.