Бразилийн Конгрессийн гишүүн Флорделис дос Сантос де Соуза нь удаа дараагийн бүтэлгүй оролдлогын дараа санваартан нөхрөө хөнөөсөн хэмээн буруутгагджээ.
Тодруулбал, 2019 оны зургадугаар сард гэртээ 30 гаруй удаа буудуулан амиа алдсан түүний нөхөр болох Андерсон до Кармог хөнөөх захиалгыг эхнэр нь өөрөө өгсөн хэмээн шүүх үзжээ.
59 настай хатагтай Де Соуза нөхрөө нас барах үеэр цагдаа дуудан дээрмийн халдлагын үеэр ийм зүйл болсон гэж мэдүүлэг өгч байсан аж.
Гэхдээ Рио-де-Жанейро мужийн цагдаа нар Даваа гарагт аллагын хуйвалдааныг илрүүлж, аллага үйлдсэнтэй холбогдуулан хатагтай Де Соуза болон түүний зургаан хүүхэд, нэг ачийг баривчилжээ.
Тус аллагын хэргийг хариуцсан цагдаа сэтгүүлчдэд мөрдөн байцаалтын ажиллагааны дүгнэлтийг танилцуулахдаа “Хатагтай де Соуза энэ аймшигт аллагыг төлөвлөсөн байсан” гэж албан ёсоор мэдэгдсэн байна.
Аллагын шалтгаан нь хатагтай де Соуза нөхрийнхөө амьдралын хэв маяг болон гэр бүлийнхээ санхүүг барьж буй байдалд нь дургүйцдэг байсантай холбоотой гэжээ.
Цагдаагийнхан мөрдөн байцаалтын хуулбарыг, нотлох баримтын хамт Конгрессын доод танхим руу илгээсэн байна. Хатагтай де Соузагийн харьяалагддаг Социал демократ намаас түүний гишүүнчлэлийг нэн даруй түдгэлзүүлж, хэрэг хянан шийдвэрлэх ажиллагааны явцад намаас хөөнө гэж мэдэгджээ.
Эх сурвалж: Evening Standard
Х.Үүрийнтуяа
