ЭМЯ-ны ээлжит хэвлэлийн хурлын үеэр ХӨСҮТ-ийн Ерөнхий захирал Д.Нямхүү коронавирусний шинжилгээний хариунуудын талаар мэдээлэл өглөө. Тэрээр:

-Өчигдөр буюу долдугаар сарын 29-ны өдөр ХӨСҮТ болон Дархан-Уул аймаг дахь салбар лабораториудад нийтдээ 520 хүнд коронавирус илрүүлэх шинжилгээ хийлээ. Бүгдэд нь вирус илрээгүй байна.

Үүнийг дэлгэрэнгүй танилцуулбал, долдугаар сарын 15-нд Сөүл-УБ-ын 2 онгоцоор ирсэн 439 хүний хоёрдахь давтан шинжилгээг хийхэд коронавирус илрээгүй. Мөн ХӨСҮТ-д тусгаарлагдсан 4 хүний давтан шинжилгээ, тандалтын зорилгоор авсан 3 хүний сорьц,Алтанбулагаар орж ирсэн 33 жолооч, Сэлэнгэд тусгаарлагдсан 32 хүний давтан шинжилгээ, найман эмч, эмнэлгийн ажилчдыг хамруулсан шинжилгээ, Дархан-Уул аймагт тусгаарлагдсан 1 хүний давтан шинжилгээ багтаж байгаа бөгөөд тус тус коронавирус илрээгүй гэлээ.