Өвөрхангай аймгийн Арвайхээр суманд тарвага агнасан, түүхий эдийг ашиг олох зорилгоор олон тоогоор худалдаалсан, тээвэрлэсэн 19 зөрчлийг илрүүлсэн талаар холбогдох албаныхан мэдээллээ.

Дээрх зөрчлийг үйлдсэн 19 иргэнд 1.89 сая төгрөгийн торгууль ногдуулжээ. Түүнчлэн байгаль орчинд учирсан хохирлын 76.26 сая төгрөгийг нөхөн төлүүлжээ.

Манай улсын Засгийн газрын 2023 оны 260 дугаар тогтоолоор нэг ширхэг тарваганы экологи, эдийн засгийн үнэлгээ хоёр дахин өсөж, 410 мянган төгрөг болсон юм. Тиймээс Амьтны тухай хуулийн 49 дүгээр зүйлд заасны дагуу тус үнэлгээг хоёр дахин нугалж, төлүүлж байгаа аж.