Монгол Улсын нэрийг олон улсын тайзнаа дуурсгахаар Улсын Филармонийн Морин хуур найрал хөгжмийн флейт хөгжимчин, дуучин Б.Одмандах Бүгд Найрамдах Киргиз Улсыг зорилоо.

Тэрээр Киргизийн үзэсгэлэнт Иссык-Куль нуурын хөвөөнд наймдугаар сарын 31-нээс есдүгээр сарын 6-ны өдрүүдэд зохион байгуулагдах “Meikin Asia” олон улсын эстрад хөгжмийн наадамд Монгол Улсаа төлөөлөн оролцож байна. Энэ жилийн наадам Дэлхийн нүүдэлчдийн VI наадмын соёлын хөтөлбөрийн хүрээнд “Echo of Nomads” нэрийн дор, олон улсын этно-фестивалийн шинэ агуулга, тодотголтойгоор зохион байгуулагдаж буйгаараа онцлог юм.

Наадам Кыргызын угсаатны адуу, морин спорт, угсаатны соёлын хөгжлийн улсын төвийн Бактуу-Долоноту ипподромын тайзнаа болж, Монгол, Киргиз, Казахстан, ОХУ, Турк, Куба, Мексик, Итали, АНУ, Испани, БНСУ зэрэг 20 орны 21 дуучин, уран бүтээлч оролцоно. Оролцогчид тус бүр хоёр бүтээлээрээ ур чадвараа сорин өрсөлдөх юм.