ХХААХҮ-ийн сайд асан Т.Бадамжунайг АТГ-аас шалгаж дуусан, хэргийг шүүхэд шилжүүлэх саналтай прокурорын байгууллагад шилжүүлжээ. Тодруулбал, түүнийг албан тушаалын байдлаа урвуулан ашиглаж бусдаас хахууль авсан, мөн "Эрдэнэт үйлдвэр" ТӨҮГ-ын 2018.02.28-ны өдөр Зэсийн баяжмал худалдан авах гэрээнд хууль бусаар нөлөөлж өөртөө, бусдад давуу байдал бий болгосон гэх хэрэгт шалгаж байсан юм.

Сануулахад, түүнийг "Шувуу" ажиллагааны хүрээнд өнгөрсөн дөрөвдүгээр сарын 5-нд Филиппин улсын Сэбү хотоос авч ирэн, шууд цагдан хорьсон байдаг. Харин түүний өмгөөлөгч энэ сарын 7-нд цагдан хорих хүсэлтийг өөрчлүүлэх хүсэлт гаргасныг шүүх наадмын өмнө буюу энэ сарын 10-нд хэлэлцэж, "Мөрдөн байцаалтад саад учруулсан нөхцөл байдал тогтоогдохгүй байна" хэмээн цагдан хорих арга хэмжээг өөрчилж, суллах шийдвэр гаргасан юм. Ингэхдээ Монгол Улсын хилээр гарахыг нь хязгаарласан аж.