БШУ-ны сайд Боловсролын зээлийн сангаас зээл авч гадаадын их, дээд сургуульд суралцсан хэр зээлийн эргэн төлөлтөө хийгээгүй байгаа хүмүүсийн нэрсийг ил болгоод сар гаруйн хугацаа өнгөрсөн байна. Тэр дундаа улс төрд нөлөө бүхий этгээдүүдийн хамаарал бүхий хүмүүс зээл авч гадаадын их, дээд сургуульд суралцсан талаарх мэдээлэл нь олон нийтээс ихээхэн шүүмжлэлийг хүртэж буй. Тухайлбал, УИХ-ын гишүүн асан Д.Лүндээжанцангийн хүү Мөнхдэмбэрэл нь БЗС-гаас Японы Ази Номхон далайн их сургуульд суралцахаар 32 мянган ам.долларын зээл авч байжээ. Энэ нь одоогийн ханшаар 110 сая төгрөгтэй дүйцэх мөнгөн дүнгийн зээл авч суралцсан гэсэн үг юм.