Нийслэлийн Засаг дарга С.Амарсайхан цаг үеийн асуудлаар мэдээлэл өглөө. Тэрээр долоо хоног бүр нийслэлд авч хэрэгжүүлж байгаа ажил, арга хэмжээний талаар олон нийтэд мэдээлэл өгч байгаа юм.
Өнөөдрийн мэдээлэлдээ тэрээр "Нийслэл үйлчилгээний газруудаа үе шаттайгаар нээж эхэлж байгаа. Амралтын газар, зоогийн газар, биеийн тамир фитниссийн газруудаа нээсэн. Өнөөдрөөс эхлэн номын сан, музейн үйл ажиллагааг нээж байна. Нийслэлд 12 номын сан, 11 музей үйл ажиллагаа явуулж байна. Гэхдээ номын сан, музей иргэдэд үйлчлэхдээ ариутгал, халдваргүйжүүлэлтийг журмын дагуу хийх хэрэгтэй. Цаашдаа бусад үйлчилгээний газруудыг хэвийн явуулахаар, нээхээр судалгаа, бэлтгэл хийж байна. Өмнө бэлтгэлгүйгээр үйлчилгээний газруудыг нээснээр хүндрэл гарсан. Энэ алдааг давтахгүйн тулд холбогдох байгууллагууд судалгаа хийж байгаа" гэв.
