УИХ-ын гишүүн Т.Аюурсайхан, "Ажнай" Д.Бат-Эрдэнэ нарын бүрэн эрхийг түдгэлзүүлсэн. Д.Бат-Эрдэнэ нь АН-аас сонгогдсон гишүүн. Тиймээс уг асуудлаар АН-аас байр сууриа илэрхийллээ.
АН-ын гишүүн О.Баасанхүү "Манай АН-ын нэрээр сонгогдон бүрэн эрхээ хэрэгжүүлж байсан Д.Бат-Эрдэнийн бүрэн эрхийг түдгэлзүүллээ. АН 11 УИХ-ын гишүүнтэй. Гэтэл Д.Бат-Эрдэнийн бүрэн эрхийг түдгэлзүүлсэнээр Өмнөговь аймаг УИХ-ын төлөөлөлгүй боллоо. Энэ асуудлыг бид анхааралтай ажиглаж байна. Сүүлийн үед АН руу дайрах, АН-ын нэр хүндийг гутаах, даргыг нь доромжлох зорилготой зохион байгуулалттай мэдээлэл гарч байгаа. Үүнийг МАН-ын санхүүжилттэй гэж хардаж байгаа. Тиймээс уг асуудлыг хууль хяналтын байгууллагад өгч шалгуулна.
Тодруулбал, 1 тэрбум төгрөгийг гишүүдэд өгсөн, намын дарга нь худалдагджээ зэрэг гүтгэлгийн шинжтэй мэдээллийг засваргүй сошиал, хэвлэлээр цацсан. Үүнд маш их харамсаж байна" гэлээ.
Мөн Халдашгүй байдлын дэд хороонд АН-ын төлөөллийг зохион байгуулалттайгаар оруулаагүй. Оруулаагүй учир Өмнөговь аймгийн төлөөлөл хэн байх вэ гэдгийг МАН-ын хуйвалдааны аргаар шийдэж байна. Тиймээс Өмнөговь төлөөлөлгүй болж буй асуудалд хариуцлагатай байх ёстой. Хэн нэгэн гэмт хэрэгт шалгагдаж байгаа бол хуулийн дагуу шалгагдаад явах ёстой" гэлээ.
