Нийслэлийн Засаг даргын хэрэгжүүлэгч Агентлагууд болон Японы “Хүүхдийг ивээх сан” хамтран "Охидын хүчирхийлэл, бэлгийн мөлжлөг"-ийн эсрэг “Харилцан ойлголцлын санамж бичиг” байгуулсан. Энэ хүрээнд “Хүчирхийлэл, мөлжлөгийн хохирогч болсон охидод сэтгэцийн гэмтэлд суурилсан, хохирогч /даван туулагч/ төвтэй үйлчилгээ үзүүлэх, чадавхжуулах уулзалт хийсэн байна.
Энэхүү уулзалт нь Японы “Хүүхдийг ивээх сан”-гаас НҮБ-ын Итгэлцлийн Cангийн санхүүжилтээр "Хөөрхөн зүрх” ТББ-тай хамтран 2021-2024 онд хэрэгжих “Охидыг хүчирхийлэл, мөлжлөгөөс хамгаалах нь” төслийг Баянгол, Баянзүрх, Сонгинохайрхан, Сүхбаатар, Чингэлтэй дүүргийн 12-18 насны охидыг хүчирхийлэл, мөлжлөгөөс эрүүл мэнд, хүүхэд хамгаалал, боловсролын үйлчилгээгээр дамжуулан хамгаалах зорилготой юм.
Ингэхдээ хүүхэд хамгааллын чадавхжуулах 11 багц сургалтын модулийг мэргэжлийн багтай хамтран боловсруулсан. Уг сургалтыг хохирогчдод/даван туулагч/ хамгийн анхан шатны зөвлөгөө үйлчилгээ өгдөг төрийн болон иргэний нийгмийн байгууллагын мэргэжилтнүүд гээд 600 гаруй хүнд зааж, чадавхжуулж байна.
Мөн төслийн нэг чухал зорилго нь мэдлэг, мэдээллийг түгээх зорилготой 3 том сошиал нөлөөллийн ажлыг хоёрдугаар сараас эхлэн явуулна. Үүнд хохирогчид /даван туулагч/ хэрхэн даван туулах, хүчирхийлэл гэж юу вэ, хүчирхийлэлд өртсөн бол хэнд хандах, шууд үйлчилгээ үзүүлж буй хүмүүст мэдлэг өгөх юм байна.
Б.Арвинзаяа
