Коронавируст халдварын шинээр бүртгэгдсэн хувилбарын талаар ХӨСҮТ-өөс мэдээлэл хийлээ. Энэ үеэр ХӨСҮТ-ийн Ерөнхий захирал Ц.Билэгтсайхан "Коронавирусийн шинэ BF7 хувилбараар өвчилсөн нэг хүн нь 72 настай, БНХАУ-ын иргэн байна. ОХУ-д ажиллаж байгаад манай улсад ирсэн. Одоогоор биеийн байдал тогтвортой байгаа. Зочид буудалд тусгаарлагдан эмчилгээгээ хийлгэж байна. Харин бусад таван тохиолдлын хувьд бүгд манай улсын иргэд байна. Эдгээрээс гурван эрэгтэй, хоёр эмэгтэй хүн байна. Эдгээр хүмүүс 10 дугаар сарын дундуур шинжилгээ өгсөн. Халуурах, хоолой хөндүүрлэх шинж тэмдгүүд зонхилж байна. Эдгээр иргэдийн хоёр нь эмнэлэгт хэвтэн эмчлүүлж байна" гэлээ.