Нийтийн тээврийн араас буй сурагчийн бичлэг олон нийтийн хэрэгслээр цацагдсан нь иргэдийн шүүмжлэлийг дагуулаад буй. Бичлэгт нэгэн сурагч автобусанд суухаар араас нь гүйсэн ч жолооч нь зогсохгүй явчихдаг. Улмаар охин унаж байгаа нь бичигдэн үлджээ. Тус бичлэг нь өнгөрсөн тавдугаар сард гарсан үйл явдал бөгөөд Зүрх уулын эцсийн буудлаас автобус хөдлөх явцад хүүхэд автобусны араас гүйж унажээ.

Уг автобусны жолооч "хүүхэд араас нь гүйж байгааг мэдээгүй. Толиндоо хараагүй" гэх тайлбарыг өгчээ. Харин охин унахдаа гараа хугалж, зөөлөн эдийн гэмтэл авсан байна.

Энэ талаар Нийслэлийн Засаг даргын Хэвлэлийн төлөөлөгч Н.Сугараас тодруулахад "Тус үйл явдал 2022.05.05-ны өдөр болсон. Хүүхдийн гар хугарч, гэмтэл авсан учраас хэргийг эрүүгийн цагдаагийн газар хэргийг шалгасан. Ослын хувьд зорчигчийн буруутай үйлдэл гэж үзэн цагдаагийн байгууллага хэргийг хаасан. Харин Blue bus компанийн зүгээс жолоочийг цалинг 30 хувиар бууруулж, 3 сарын хугацаанд ажлыг нь хийлгээгүй гэж мэдээлэл ирлээ" хэмээсэн юм.