Ардчилсан залуучуудын холбоог 200 сая төгрөгөөр худалдах гэж байгаа талаар тус холбооны удирдлагууд болон гишүүд өнөөдөр Төв талбайд мэдээлэл хийсэн. Үүний дараагаар тэдний зүгээс намын үйл ажиллагаатай холбоотой болон есдүгээр сарын 19-нд зохион байгуулагдах Ардчилсан залуучуудын чуулгантай холбоотой шаардлагаа АН-ын дарга С.Эрдэнэд хүргүүлсэн юм. Шаардлагыг АН-ын дарга С.Эрдэнэ өөрийн биеэр хүлээн авснаа мэдэгдэж, Үндэсний бодлогын хороонд хүргүүлнэ хэмээн мэдэгдэв.

Энэ үеэр тэрбээр Ардчилсан намын тамга Х.Баттулгад байгаа хэмээн илэрхийлсэн гишүүний өөдөөс "Чи Оросын троллтойгоо зайлаарай. Та нар Монголыг худалдахгүй. Би тусгаар тогтнолын төлөө энд зогсож байгаа. Хэн нэгэн Оросын тавиулын гар хөлөөр Монгол Улсыг самруулахгүйн төлөө зогсож байгаа. Ардчилсан намыг би хэн нэгэн Оросын тавиулд өгөхгүй. Х.Баттулгад ямар ч тамга байхгүй. Халтмаагийн Баттулга Ерөнхийлөгчөөсөө буусан. Одоо жинхэнэ титэм үгээ бичээд сууж байх ёстой шүү дээ" гэв.