АН-ын бүлгийн гишүүд өнөөдөр хуралдаж олонхын саналаар бүлгийн шинэ даргаараа О.Цогтгэрэлийг сонгосон. Тэгвэл үүнтэй холбогдуулан тус бүлгийн дарга /УИХ-ын дарга чуулганы хуралдаанд дараагын даргын нэрийг уншиж танилцуулаагүй тул/ Д.Ганбат УИХ-ын дарга Г.Занданшатарт хандаж эсэргүүцсэн албан бичиг хүргүүлжээ.
Тодруулбал, УИХ-ын гишүүн Д.Бат-Эрдэнэ, Д.Ганбат, А.Адъяасүрэн нар өнөөдрийн бүлгийн хуралд оролцоогүй. Мөн УИХ-ын гишүүн Б.Пүрэвдорж гадаад томилолттой байхад өнөөдөр бүлгийн дарга асуудлыг хэлэлцэж шийдвэрлэсэн нь эдгээр гишүүдийн бүлгийн даргад өрсөлдөх эрхийг бүдүүлгээр зөрчсөн гэж үзжээ.
Тиймээс өнөөдрийн АН-ын бүлгийн хурлаас гаргасан шийдвэрийг УИХ-ын дарга Г.Занданшатарыг хүлээн авахгүй байхыг хүсжээ.
Мөн өнгөрсөн хаврын чуулганаар батлагдсан бүлгийн даргыг бүлгийн олонх нь огцруулдаг хуулийн өөрчлөлтийг ҮХЦ-д зарим иргэд өгч буй талаар албан бичигтээ дурджээ.
Ийнхүү өнгөрсөн даваа гарагт мэдээлж байсанчлан АН-ын бүлгийн шинэ даргын асуудал дахин нэг хэсэг мухардалд орж, хэрүүлийн сэдэв болох бололтой. Одоогоор албан ёсоор 11 гишүүнтэй байгаа АН-ын бүлгийн гишүүдийн 4 нь өнөөдрийн хуралд оролцоогүй тул 7 гишүүний гаргасан шийдвэрийг бусад гишүүд нь хүлээн зөвшөөрөхгүй бололтой.
