Засгийн газрын ээлжит хуралдаан боллоо. Хуралдаанаас гарсан шийдвэрийн талаар Сангийн сайд Б.Жавхлан “Хөдөө аж ахуйн салбарт хэрэглэгдэх 10 мянган тн хүртэлх дизель түлшний үнэд зохицуулалт хийх асуудлыг хэлэлцлээ. Өөрөөр хэлбэл, энэ жилийн хаврын тариалалтын үед литр нь 3400 орчим төгрөг байсан. Гэтэл гадаад зах зээлд үүссэн нөхцөл байдлаас болж үнийн өсөлт явагдсан.

Тиймээс шатахуунаас хамааралтай үнийн өсөлт бага байх, тодорхой хугацаанд үнэ бууруулах арга хэмжээ авахаар боллоо. Ингэснээр дизель түлшний үнийг хаврын үнэ болох 3400 орчимд хүргэхээр шийдвэрлэлээ. Ингэснээр ирэх жилийн хавар үнэ хөөрөгдөхөөс хамгаалах сайн талтай.

Шатахууны үнийн өсөлт биднээс хамаарах боломжгүй гэдгийг иргэд ойлгох хэрэгтэй. Гадаад зах зээлийн үнийг дагахаас аргагүй. Гэхдээ АИ-92 шатахууныг он дуустал 830 ам.доллараар нийлүүлэхээр болсон. ОХУ-аас энэ шийдвэртэй холбоотой баталгаажуулалтын захидал илгээсэн" гэлээ.