Эдийн засгийн байнгын хорооны өчигдрийн хуралдааны үеэр Монголбанкны 2 тэрбум ам.доллар буюу 7.4 их наядын алдагдлын асуудал сөхөгдөв. Тэгвэл Сангийн сайд Б.Жавхлан бодлогын хүүтэй холбогдуулан "Бодлогын хүү 12 хувьай байхад 8 их наядын үнэ цаастай байна гэдэг нь жилийн нэг их наядын зардал гарч байна гэсэн үг. Энэ нь алдагдал дотроо ч бас багтаж байгаа. Өөрөөр хэлбэл, 7 их наядын нэг их наяд нь бодлогын хүүгээр гарах нь. Энэ нь өөрөө инфляцыг нам дор байлгах, эдийн засгийн аюулгүй байдлыг хамгаалахын төлөө, инфляциас хамгаалахын төлөө гаргаж буй бодлогын зардал. Тиймээс биш үйл ажиллагааны алдагдал болж, үүнээс болж үйл ажиллагаа явуулж чадахгүй гэсэн үг биш. Төвбанкны бодлогын зардал бол өөр ойлголт. Харин энэ зардал нь эдийн засгийн макро тогтвортой байдалтай шууд холбоотой. Тэгэхээр макро бодлого тогтвортой байхын хэрээр энэ зардал бага гарна гэсэн үг. Энэ нь бидний төлбөрийн тэнцэл эерэг, инфляц нам дор, үйлдвэрлэл бий болдог, орох урсгал сайтай, ДНБ байнгын өсөлттэй, нэг хүнд ногдох ДНБ-ий үндэсний орлого 10 мянган ам.доллараас дээш гарах ийм үед төвбанкны бодлогын зардал багасах учиртай. Ер нь аливаа улсын төвбанкууд дээрх алдагдлыг Засгийн газар нь үүрэлцэж болно гэсэн гарц байдаг. Хэзээ нэгэн цагт бодлогын шийдэл ашиглаж болохыг үгүйсгэхгүй. Тэгэхээр бодлогын хүү буурах нь төвбанкны зардал багасна гэсэн үг. Бодлогын хүү багасах нөхцөл хэзээ бүрдэх вэ гэхээр, инфляц нам дор, төлбөрийн тэнцэл эерэг, дотоодын үйлдвэрлэлийн чадвар сайн, гадаад өрийн менежмент сайн үед л буурна" гэлээ. Үргэлжлүүлэн Монголбанкны Ерөнхийлөгчид хариуцлага тооцох эсэх тухайд хариулахдаа "Төвбанкны алдагдал бол Монголбанкны асуудал биш, макро тогтвортой байдлын асуудал. Макро тогтвортой байдал өвчтэй байвал улам л зардал нэмэгдэнэ. Тиймээс төвбанкны Ерөнхийлөгчөөс хамаарах ч зүйл байна, хамаарахгүй ч зүйл байна. Тэгэхээр дан ганц хариуцлага тооцдог асуудал биш гэж бодож байна" гэлээ.