Түлхүүр мэдээлэл:

• АНУ-ын газрын тосны үнэ түүхэндээ анх удаа хасах утга руу орлоо.
• Газрын тосны эрэлт буурч, олборлогчид илүүдэл нөөцөө хадгалах савгүй болжээ.
• Дээрх шалтгаанаар олборлогчид хүмүүст өөрсдөө мөнгө төлөн илүүдэл газрын тосоо өгсөн байна.

Ковид-19 цар тахал дэгдсэнээс хойш дэлхийн эдийн засгийн зах зээлд урьд өмнө байгаагүй хэлбэлзэл үүсэх болов. Тухайлбал, өчигдөр буюу даваа гарагт АНУ-ын газрын тосны үнэ урьд байгаагүйгээр буурч, хасах утга руу оржээ.

Учир нь зах зээлийн эрэлт буурч, газрын тосны илүүдэл нөөцөө хадгалах савгүй болсноос олборлогчид өөрсдийн илүүдэл нөөцийг худалдан авагчдад мөнгө төлж нийлүүлсэн байна. Даваа гарагт West Texas Intermediate (WTI) төрлийн газрын тосны тавдугаар сарын фьючерс гэрээний үнэ баррель нь -$37.63 хүрсэн юм.

Өчигдөр тавдугаар сарын фьючерс гэрээний хугацаа дуусах сүүлчийн өдөр байв. Ирэх сард газрын тосны эрэлт муу хэвээр байна гэж шинжээчид үзэж байгаа нь эндээс харагдаж байна. Харин зургаадугаар сарын WTI газрын тосны фьючерсийн үнэ баррель нь $20 орчим байгаа нь цаашид эрэлт нэмэгдэнэ гэсэн хүлээлт үүссэнийг харуулжээ.