Түлхүүр мэдээлэл:

• ​БНСУ-д Ковид-19 халдвар аваад эдгэсэн 163 хүний шинжилгээнээс дахин вирус илэрчээ.
• Эрдэмтэд уг өвчтөнүүдийн вирусийг өдөөх гэж үзсэн ч болоогүй тул амьд вирус байхгүй гэх дүгнэлтэд хүрсэн байна.
• Тус улсын ашигладаг шинжилгээний аппарат нь маш мэдрэг тул үхсэн вирусний үлдэгдлийг илрүүлэн, эерэг хариу гаргаж байх боломжтой гэж үзжээ.

БНСУ-ын Эрүүл мэндийн ажилтнууд нэгэн учир битүүлэг тохиолдлын нууцыг тайлж, учир шалтгааныг олохоор эрэлд гараад байна. Тэр бол Ковид-19 халдвар аваад эдгэсэн 163 хүнээс дахин коронавирус илэрсэн явдал юм. Зөвхөн тус улсад ч биш, БНХАУ-д ч ийм тохиолдлууд бүртгэгдээд буй. Тэгвэл шинэ төрлийн коронавирусний халдвар аваад эдгэсэн хүмүүс дахин өвчлөх боломжтой юу?

Өнгөрсөн баасан гаригт Өмнөд Солонгосын Өвчний хяналт урьдчилан сэргийлэх төвөөс тус улсын халдвар аваад эдгэсэн 7829 хүний 2,1 хувьд нь давтан шинжилгээгээр вирус илэрсэн тухай зарласан юм.

Энэ талаар Өвчний хяналт урьдчилан сэргийлэх төвийн орлогч захирал Квон Жун-Вук “Давтан шинжилгээгээр эерэг хариу гарсан ихэнх өвчтөнүүдэд халдварын шинж тэмдэг илрээгүй, гэхдээ тэдний 44 орчим хувь нь бага зэргийн шинж тэмдэгтэй байсан” гэжээ.

Гэвч тэд давтан шинжилгээгээр эерэг хариу гарсан өвчтөнүүд үнэхээр дахин халдвар авсан эсэх дээр баттай хариу олж мэдээгүй байгаа юм.

Одоогоор үүнийг тайлбарлах хамгийн боломжит хувилбар бол тэдний шинжилгээ хийдэг Со Reverse PCR аппарат нь үхсэн вирусний РНХ уургийн үлдэгдэлийг илрүүлснээс эерэг хариу гарсан байх магадлалтай гэх таамаг юм.

Дэлхийн олон улс орны нэгэн адил Өмнөд Солонгос нь вирусний тест хийхдээ урвуу транскрипцийн полимеразын гинжин урвалын (RT-PCR) аппарат ашигладаг.

Уг аппарат нь өвчтөнөөс авсан дээжээс вирусний генетикийн мэдээлэл буюу РНХ-г илрүүлэх, хайж олох замаар ажилладаг байна.

Квоны хэлснээр уг шинжилгээний аппарат нь маш мэдрэмтгий тул хүн эдгэрсний дараа ч үхсэн вирусний РНХ-ийн үлдэгдэл хэсгүүдийг илрүүлэх боломжтой гэжээ.

Тиймээс дээрх тайлбар нь одоогоор хамгийн үнэнд ойр, ул суурьтай тайлбар болоод байна.

Харин уг тайлбарыг Хятад улсын судлаач, амьсгалын замын хамгийн алдартай мэргэжилтнүүдийн нэг болох Жонг Наньшан няцаасан байна. Тэрээр өнгөрсөн 7 хоногийн эхээр хэвлэлийн хурал хийхдээ халдвар аваад эдгэсэн хүн ч дахин халдвар авах боломжтой хэмээн тайлбарлажээ.

Эх сурвалж: CNN 

Х.Үүрийнтуяа