Энэ сарын 9-нд Булган аймгийн Сэлэнгэ сумын Хялганат тосгоноос баруун зүгт 35 км-т/ “Портер” загварын ачааны автомашинтай зорчиж явсан 3 хүн сураггүй алга болсон байна. Тиймээс цагпаагийн байгууллагаас уг иргэдийг “Сэлэнгэ” мөрөнд осолдсон байж болзошгүй хэмээн эрэн хайх ажиллагааг эхлүүлэх саналыг онцгой байдлын газарт гаргажээ. Улмаар энэ сарын 19-ний өдрөөс тус аймгийн Онцгой байдлын газрын даргаар ахлуулсан алба хаагчид, тус сумын Засаг даргын Тамгын газрын ажилтнууд иргэн С /47 настай, эрэгтэй/, О /47 настай, эмэгтэй/, Б /6 настай, эрэгтэй/ нарыг 3 бүлэгт хуваагдан,

1 дүгээр бүлэг “Харлагын голын-Адаг” гэдэг газраас зүүн зүгт 1 км-т урсан 6 метрийн гүнд 14 удаагийн шумбалт хийж,

2 дугаар бүлэг Харлагын голын-Адаг гэдэг газраас зүүн зүгт 3 км голын эрэг болон усаар хайж,

3 дугаар бүлэг тус сумын Ингэтийн гүүрнээс Хялганатын гүүр хүртэл зүүн зүгт 30 км-т урсаж, тус тус эрэн хайх ажиллагааг зохион байгуулсан боловч үр дүнд хүрээгүй тул 20:00 цагт түр зогсоожээ. Улмаар өнөөдөр 07:30 цагаас эрэн хайх ажиллагааг дахин эхлүүлсэн байна.