Манай улсын Тагнуулын Ерөнхий газраас БНХАУ дахь коронавирусийн судалгаа шинжилгээний үр дүнгийн талаар мэдээлжээ. Тэдгээрийн дундаас хамгийн сонирхол татсан нь коронавирусийн эсрэг ашиглах уламжлалт эмчилгээний үрэл байлаа.

Хятадын Үндэсний уламжлалт эмийн удирдлагын газраас гуравдугаар сарын 18-ны өдөр уламжлалт эмчилгээний хоргүйжүүлэх үрлийг эмнэлзүйн туршилтад оруулжээ. Тэрхүү туршилтын дараа тус үрлийг коронавирусийн эмчилгээнд зөвшөөрөгдсөн анхны уламжлалт эмээр батламжилсан байна. Энэ нь вирус устгах, дархлааг сайжруулахад сайн үйлчилгээтэй аж.

Мөн энэ сарын 21-ний өдөр БНХАУ-ын хэмжээнд 18 мужид коронавирусээр өвчлөөд эдгэсэн хүмүүсээс нийт 1000 плазмын дээж цуглуулж, 352.000 мл-ийг хадгалжээ. Эдгэрсэн нэг хүн дунджаар 2-3 өвчтөний эмчилгээнд ашиглаж болох плазм хандивласан байна. БНХАУ-ын Ухань хотын Биологийн хүрээлэнгийн захирал Дуан Кай хэлэхдээ:

“Эдгэрсэн хүмүүсийн цуснаас авсан плазмыг өвчтөнүүдэд хийснээс хойш 48 цагийн дотор биен дэх нуклейн хүчлийн шинжилгээ сөрөг болж, бие нь сайжирч байна. Үрэвслийн гол үзүүлэлтүүд мэдэгдэхүйц буурч, лимфоцитын хэмжээ болон цусны хүчилтөрөгчийн ханалтын хэмжээ нэгэн зэрэг нэмэгдсэн нь эмчилгээ сөрөг нөлөөгүй бөгөөд үр дүнгээ өгч буйн илрэл юм” гэсэн байна.

Эх сурвалж: Тагнуулын Ерөнхий Газар