МИАТ компанийн Истанбул-Улаанбаатар чиглэлийн тусгай үүргийн нислэг 18:15 цагт Истанбулын онгоцны буудлаас хөөрлөө гэж Гадаад харилцааны сайд Д.Цогтбаатар мэдээлэв.

Тус нислэгээр нийт 252 зорчигч эх орондоо ирж буй ажээ. Түүнчлэн Сөүл, Берлин, Москва, Токио, Истанбулаас нийт 982 монгол иргэнийг эх оронд нь авчрах юм.

ЭМЯ, МХЕГ-ын мэргэжилтнүүд газар дээр нь очиж эрсдэлийг үнэлж ажилласан бөгөөд ирж буй нийт иргэдийг 14 хоногийн хугацаанд тусгаарлана. 

Улсын Онцгой комиссын шийдвэрээр томилсон нислэгийн бүрэлдэхүүнд Буянт-Ухаа боомт дахь Хилийн мэргэжлийн хяналтын албаны Эрүүл ахуй, халдвар хамгааллын хяналтын улсын ахлах байцаагч 2, ХӨСҮТ-ийн 1 эмч, экипажийн бүрэлдэхүүнд 4 нисгэгч, 2 инженер, техникийн ажилтан, 9 үйлчлэгч багтжээ.