Үндсэн хуулийн цэцийн их суудлын хуралдааныг өнөөдөр буюу энэ сарын 27-ны 09.30 цагаас нээлттэй хийхээр товлосон билээ. Энэ дагуу Их суудлын хуралдаан үргэлжилж байна. Тус хуралдаанд УИХ-ын Итгэмжлэгдсэн төлөөлөгчөөр УИХ-ын гишүүн, ХЗБХ-ны дарга Д.Цогтбаатар оролцож байна.

Яг одоо асуулт хариулт дууссан бөгөөд мэтгэлцээний үе шат эхэллээ. Маргааныг тодруулбал, Монгол Улсын Их Хурлаас 2021 оны 01 дүгээр сарын 15-ны өдөр баталсан Монгол Улсын шүүхийн тухай хуулийн 36 дугаар зүйлийн 36.7 дахь хэсэгт “Улсын дээд шүүхийн Ерөнхий шүүгчийг Улсын дээд шүүх санал болгосноос хойш Ерөнхийлөгч 14 хоногийн дотор зургаан жилийн хугацаагаар, зөвхөн нэг удаа томилно” гэсэн заалтын “... зөвхөн нэг удаа ...” гэж заасан нь Монгол Улсын Үндсэн хуулийн цэцийн 2016 оны 12 дугаар сарын 02-ны 12 дугаар дүгнэлтээр хүчингүй болсон заалтыг агуулгаар нь дахин сэргээж, Монгол Улсын Үндсэн хуулийн Тавин нэгдүгээр зүйлийн 2 дахь хэсгийг зөрчсөн эсэх маргааныг шийдвэрлэх юм.

Сануулахад, одоо ажиллаж буй УДШ-ийн Ерөнхий шүүгч Д.Ганзоригийг 2020 оны зургаадугаар сарын 2-нд тухайн үеийн Ерөнхийлөгч Х.Баттулгын зарлигаар томилж байсан бөгөөд ирэх зургаадугаар сарын 2-нд бүрэн эрхийн хугацаа нь дуусаж буй.