“Монголын төмөр зам” ТӨХК-ийн удирдлагууд Монгол Улсын Хөгжлийн банкны Гүйцэтгэх захирал С.Баатарсүрэн тэргүүтэй төлөөлөлтэй албан уулзалт хийж, “Багахангай–Хөшигийн хөндий” чиглэлийн салбар төмөр замын төслийн санхүүжилтийн асуудлаар санал солилцлоо. Уулзалтад “Монголын төмөр зам” ТӨХК-ийн Гүйцэтгэх захирал О.Батчулуун, Санхүү хөрөнгө оруулалт, төлөвлөлтийн газрын дарга Б.Батхишиг, Төсөл хөтөлбөр, судалгааны төвийн дарга Б.Тамир нар оролцож, төслийн хэрэгжилтийн явц, цаашид хэрэгжүүлэх арга хэмжээний төлөвлөгөөг дэлгэрэнгүй танилцуулсан юм. Монгол Улсын Хөгжлийн банкны зүгээс төслийн санхүүжилтийг шийдвэрлэх боломж, нөхцөлийн талаар нэмэлт судалгаа, тооцоолол хийж, үр дүнг эргэн танилцуулахаар боллоо.