АН-ын ҮБХ-ны ээлжит бус хуралдаан өчигдөр болж, одоогийн дарга Лу.Гантөмөрийн огцрох өргөдлийг хэлэлцэн хүлээн авч, дараагийн даргад нэр дэвшигчдийг энэ сарын 31-ний өдөр хүртэл бүртгэхээр болсон. Тэгвэл эл сунгаанд УИХ-ын гишүүн Л.Мөнхбаясгалан, Ч.Лодойсамбуу нар нэр дэвшинэ гэдгээ илэрхийлээд байсан ч намын ҮБХ-нд дөрвөн жил ажиллаагүй гэдэг утгаар нэр дэвших боломжгүй болсон юм.
Үүнтэй холбоотойгоор УИХ-ын гишүүн Л.Мөнхбаясгалан "Намын даргад өрсөлдөх эрхгүй боллоо. АД ҮЗЭЖ намайг хурцалсан бүх хүнд баярлалаа.ЧИ ЧАДНА гэж намайг дэмжсэн бүхэнд аз жаргал ерөөе. Хэр их дайсантайгаа мэдэж, тэрнээс ч олон дэмжигчээ олж авсан өдрүүд байлаа. АН -ыг ЯЛДАГ НАМ болгохын төлөө, АРД ТҮМНЭЭ сайхан амьдруулахын төлөө , ҮНДЭСНИЙ үзлийг тунхаглахын төлөө, Монгол хүн Монголдоо АД ҮЗЭГДЭХГҮЙ амьдардаг болохын төлөө няцашгүй зүтгэх ёстойгоо улам мэдэрч хүч орлоо. Эцэст нь АД ҮЗЭГДЭХ зоригтой байсан өөртөө жаахан ч гэсэн талархаж өнөө орой цуйван хийж идсүү би" гэжээ.
