Засгийн газар ээлжит бус хуралдаан өнөөдөр 11.00 цагаас товлогдсон. Ээлжит бус хуралдаанаар дараах асуудлуудыг хэлэлцэхээр төлөвлөжээ. Нэгдүгээрт,

-Монгол Улсын 2025 оны төсвийн тухай хуульд өөрчлөлт оруулах тухай,

-Үндэсний баялгийн сангийн 2025 оны төсвийн тухай хуульд өөрчлөлт оруулах тухай,

-Нийгмийн даатгалын сангийн 2025 оны төсвийн тухай хуульд өөрчлөлт оруулах тухай,

-Эрүүл мэндийн даатгалын сангийн 2025 оны төсвийн тухай хуульд өөрчлөлт оруулах тухай хуулийн төсөл болон эдгээртэй холбогдуулан боловсруулсан хууль тогтоомжийн төслийг хэлэлцэх аж.

Дашрамд, Сангийн сайд Б.Жавхлангийн мэдээлснээр, нийт 2.3 их наяд төгрөгийн хэмнэлтийн тодотгол хийх байснаас заасан хугацаанд худалдан авах ажиллагааг хийгээгүй төсөл, арга хэмжээний санхүүжилт 535 тэрбум төгрөг Төрийн хэмнэлтийн хуулийн дагуу буцаан татагдсан. Иймд 1.8 их наяд төгрөгийн тодотгол хийхээр болоод буй юм.

Хоёрдугаарт, “Дулааны гуравдугаар цахилгаан станц” ТӨХК-д гарсан аваартай холбогдуулан авах зарим арга хэмжээний тухай” Засгийн газрын тогтоолын төслийг хэлэлцэхээр болжээ.