Covid-19-ийн эсрэг эрүүл мэндийн салбарын байгууллагууд өндөржүүлсэн бэлэн байдалд ажиллаж байгаа билээ. Энэ хүрээнд өнөөдөр (2020.12.06) Эрүүл мэндийн сайд Т.Мөнхсайхан, ДЭМБ-ын суурин төлөөлөгч Сергей Диордица нар ЭХЭМҮТ-ийн шинээр ашиглалтад орж буй ариутгалын тасгийн үйл явцтай танилцаж, орны нөөц болон эрчимт эмчилгээний тасгуудад ажиллалаа.

Энэ үеэр Эрүүл мэндийн сайд Т.Мөнхсайхан “Монгол Улсад халдварын тохиолдол бүртгэгдээд байгаа эдгээр өдрүүдэд эмнэлгийн тусламж үйлчилгээ, эрүүл мэндийн байгууллага, эмнэлгүүдийн үйл ажиллагаа хэвийн байх нь хамгийн чухал. Тохиолдлоор халдвартай иргэн эмнэлгээр үйлчлүүлэхэд хэрхэн яаж тусгаарлах, бусад тасгийн үйл ажиллагааг хэрхэн доголдуулахгүйгээр иргэдэд чирэгдэлгүй үйлчлэх, халдвар хамгааллыг хэрхэн хангах талаар эмнэлгүүдэд шалгалт хийж ажиллаж байна.

ЭХЭМҮТ-ийн хувьд өндөржүүлсэн бэлэн байдлыг маш сайн хангаж ажиллаж байна. Шаардлагатай тохиолдолд хэрэглэгдэх нэг удаагийн хувцас, хэрэглэлийн нөөцийг бүрдүүлж, шинжилгээ авах, тусгаарлах өрөөнүүдийн зохион байгуулалтыг зөв хуваарилсан. ЭМЯ-ны санхүүжилтээр хүчин чадлыг нь нэмж, тохижуулсан “Амьсгалын Эрхтний Эмгэг судлалын тасаг” 80 ортойгоор ашиглалтад орсон бөгөөд болзошгүй нөхцөл байдалд тус тасгийг ашиглахаар төлөвлөгөөнд тусгагдсан.

Өнөөдөр эрүүл мэндийн салбар дан ковид гэлтгүй бусад бүх эмнэлгийн тусламж, үйлчилгээгээ өндөржүүлсэн байдалд үзүүлж байна. Энэ долоо хоногийн ажлын таван өдөрт гэхэд нийт төрөлжсөн төв эмнэлгүүдийн амбулаториор 13225 иргэн үйлчлүүлж, шаардлагатай тусламжаа авсан байна. Мөн энэ хугацаанд 800 орчим мэс засал хийгдсэн.

Азийн Хөгжлийн Банкны санхүүжилтээр “Эрүүл мэндийн салбарын хөгжил, хөтөлбөр-5”  хөтөлбөрийн хүрээнд энэ удаа ЭХЭМҮТ-д ариутгалын тасгийн барилгын их ажил, иж бүрэн тоног, төхөөрөмжийг шинэчлэх ажил дуусч, үйл ажиллагаагаа явуулахад бэлэн болоод байна. Түүнчлэн эмнэлгүүдээр үйлчлүүлж буй сэжигтэй тохиолдолтой иргэн болон хэвтэн эмчлүүлж буй иргэдээ түргэвчилсэн оношлуураар шинжилгээнд хамруулах ажил хийгдэнэ. Эрүүл мэндийн байгууллагууд маань халдварын үед зөв зохион байгуулалттайгаар ажиллаж чадвал бид халдварыг түргэн хугацаанд хумих боломжтой гэж харж байгаа” гэж хэллээ.

ЭХЭМҮТ-ийн Ерөнхий захирал Ш.Энхтөр “Дэлхий дахинаа тархаад буй Covid-19-ийн тохиолдол Монгол Улсад бүртгэгдээд сар орчим болж байна. ЭХЭМҮТ нь хүүхдийн 25 чиглэлээр, эх барихын есөн чиглэлээр цорын ганц тусламж үйлчилгээг улсын хэмжээнд үзүүлдэг эмнэлэг. Зүрх судас, хүүхдийн бөөр, дотоод шүүрэл, мэс засал, нүд, чих хамар хоолойн өвчлөлийн үед хүүхдүүд манай эмнэлэгт л ханддаг. Тэгэхээр бид үндсэн тусламж үйлчилгээгээ энэ үед тасралтгүй явуулах ёстой.

Монгол Улсын хувьд томуу, томуу төст өвчний улирал эхлэх үетэй таарч энэ халдвар дотооддоо тархсан нь тулгамдсан асуудлын нэг болоод байна. Өвчний эхний шинж тэмдэг нь аль алинд нь амьсгалын замын өвчлөлийн шинж тэмдгээр илэрдэг, Covid-19-ийн онцгой шинж тэмдэг байхгүй учраас иргэд төөрөгдөх явдал байна. Зарим тохиолдолд ханиад, томуу гэсэн оношоор эмчлэгдэх, эмчлэгдэх явцдаа коронавирусийн онош нь тодрох эрсдэл өндөр байна. Бидний хувьд эмнэлэгт хандсан сэжигтэй тохиолдлуудаа тусгаарлаж, түргэвчилсэн оношилгоог хийж ажиллаж байгаа бол хэвтэн эмчлүүлэх иргэдээ бүгдийг нь шинжилгээнд хамруулахаар боллоо. Мөн сэжигтэй тохиолдол бүртгэгдсэн тохиолдолд эмнэлгийн бусад тасгийн үйл ажиллагааг алдагдуулалгүйгээр хэрхэн зохион байгуулах тал дээр зөвлөгөө авлаа. ЭМЯ, ДЭМБ-ын гаргасан зөвлөмжийн дагуу ирүүлсэн саналыг ажил үүрэгтээ тусгаад ажиллаж байна” гэв.

Эрүүл мэндийн сайд болон ДЭМБ-ын суурин төлөөлөгч Сергей Диордица нар Хүүхдийн яаралтай тусламжийн тасаг, эрчимт эмчилгээ, амьсгалын замын тасгуудаар орж нөхцөл байдалтай танилцаж, шаардлагатай арга хэмжээ цаг алдалгүй авахаар боллоо.

Эх сурвалж: ЭРҮҮЛ МЭНДИЙН ЯАМ