Төгрөг нуурын ордтой холбоотой асуудал "өндрийг" авч буй энэ үед Ерөнхийлөгч асан Х.Баттулгын 2006 онд үүсгэн байгуулж байсан СAMEX ХХК-ийн харилцан хамаарал бүхий олон мэдээлэл гарч буй. Тухайлбал, 2023 онд Хөгжлийн банкны сонсголын үеэр СAMEX ХХК Х.Баттулгатай хамаарал нэгтэй компаниудын нэг болохыг Түр хорооны дарга Б.Энхбаяр болон шинжээч нар цохон танилцуулж байв. Тухайн үед Х.Баттулгын идэвхтэй болон өмнө хувьцаа эзэмшиж байсан гэх 40 компани танилцуулагдсан байдаг. Хасагдсан хувьцаа эзэмшигч дунд Х.Баттулгын охин, эгч нараас гадна Виржинийн аралд бүртгэлтэй компаниуд багтсан байв. Тэгвэл эл зураглалтай холбогдуулан УИХ-ын гишүүн Б.Энхбаяр Х.Баттулга руу хандан "Оффшорын загалмайлсан эцэг" гээд амжив.