Гадагшаа урсаж буй валютыг хадгалахын тулд тансаг автомашинуудад такс тавих хэрэгтэй болохыг эдийн засагч Г.Батзориг хэлсэн. Тэрбээр "Хэрэглээгээр дамжуулан импортуудыг хязгаарлаж байна. Дахиад тансаг зэрэглэлийн автомашинуудад такс тавибал иймэрхүү байдлаар валютыг хязгаарлах арга хэмжээг авч болно" гэсэн юм.
Өнөөдөр улсын гадаад валютын нөөц 4.9 тэрбум ам.доллар байгаа бөгөөд Засгийн газар валютын нөөцийг нэмэгдүүлэхэд анхаарч, Монголбанк, Санхүүгийн зохицуулах хороо импортыг хязгаарлах арга хэмжээг үе шаттай хэрэгжүүлж байгаа юм. Тухайлбал, Монголбанк өр орлогын харьцааг 50/50 болгож чангаруулсан бол бодлогын хүүг 12 хувь болгон хатууруулав. Мөн Санхүүгийн зохицуулах хороо автомашины урьдчилгааг 30 хувь болгон нэмэгдүүлэхийн зэрэгцээ банк бус санхүүгийн байгууллагуудын зээл олгох өр орлогын харьцааг 60/40 болгон чангаруулсан билээ.
