Засгийн газрын хуралдаанаас гаргасан шийдвэрийг танилцуулж байна.

--------------

Сангийн сайд Б.Жавхлан: Өнөөдөр экспортыг дэмжих, валютын нөөцийг нэмэгдүүлэх ажлын хэсгийн ээлжит танилцуулгаа хийлээ. Экспортыг нэмэгдүүлэхийн эцсийн зорилго нь валютын нөөцийг нэмэгдүүлэх. Засгийн газрын дан нөөц, Монголбанкны дан нөөц гэж байхгүй. Монголбанкны валютын нөөц л гэж бий. Тиймээс бүх талууд үүнд өндөр ач холбогдол өгч ажиллаж байгаа. Иймээс Засгийн газар бүх боломжит сувгуудаараа ажиллаж байна. Мөн Санхүүгийн тогтвортой байдлын зөвлөл долоо хоног бүрийн Мягмар гараг хуралдаж байна. Валютын нөөцийг нэмэгдүүлэх ажлыг экспортыг нэмэгдүүлэх буюу биет хэмжээг нэмэгдүүлэх, мөн санхүүгийн зах зээл дээрх нөөц бололцоогоо дайчилж энэ чиглэлээр ажиллана гэсэн үг. Банкуудын хувьд бэлэн байгаа нөөц, шинээр хөрөнгө оруулалт, хөрөнгийн зах зээл дээр хөрөнгө босгох ямар боломж байна вэ, Засгийн газрын ямар дэмжлэг байна зэрэг асуудлыг ярилцлаа. Өнгөрсөн долоо хоногт Засгийн газрын хуралдаанаас хойш манай худалдан авагч талуудтай уулзаж, зохицуулалт хийлээ. Гуравдугаар сарын 13-нд ажлын хэсэг байгуулснаас хойш өчигдрийн байдлаар Монгол Улсын валютын нөөц 5 тэрбум ам.долларт хүрлээ. Монгол Улсын валютын нөөц өмнө нь хоёр удаа 5 тэрбум ам.долларт хүрч байсан бол өчигдөр гурав дах удаагаа 5 тэрбум ам.долларыг давлаа. Цаашид тогтвортой барих, нөөцөө хамгаалах, нэмэгдүүлэх чиглэлд бодлого төвлөрүүлж ажиллана. Нэгдүгээр улирлын хувьд нүүрсэн дээр цохилт авсан ч зэсийн экспорт сайн байлаа. Өнгөрсөн оны мөн үетэй харьцуулахад Биет хэмжээгээр 40 хувь нэмэгдэж татварт төвлөрүүлдэг орлого нь ч төчнөөн хэмжээгээр нэмэгдсэн. Өөрөөр хэлбэл, нүүрснээс алдагдсан орлогыг тодорхой хэмжээгээр зэсээр нөхөж байна гэсэн үг. Хоёрдугаар улирлын хувьд эдийн засгийн идэвхжлийн үе байдаг. Гурав, дөрөв, тав, зургаадугаар сард бүтээн байгуулалтын ажил эхэлдэг. Иймд бид шууд төлөвлөж болох Засгийн газрын хөрөнгө оруулалтад онцгой анхаарч ажиллаж, ийм горимд шилжин ажиллаж байгааг дуулгая.