Эдийн засгийн байнгын хороо хуралдаж байна. Хуралдаанаар Орано майнинг компанитай байгуулах хөрөнгө оруулалтын гэрээний төслийг хэлэлцлээ. Төсөлтэй холбогдуулан гишүүд хууль санаачлагчдаас асуулт асууж, хариулт авч байна.Энэ үеэр УИХ-ын гишүүн Б.Энхбаяр "Нүүрсний стратегийн гэрээг байгуулахтай холбоотойгоор “Би ашиг сонирхлын зөрчилтэй” гэж хэлэлцүүлэгт оролцохоос татгалзсан гишүүн байна уу" гэж тодруулахад ЗГХЭГ-ын дарга Н.Учрал "Хэн ч хувийн бизнес эрхэлж болно. Гэхдээ ашиг сонирхол нь хөндөгдөж байвал тухайн асуудалд байр сууриа илэрхийлэх, санал хураалтад оролцох шаардлагагүй" гэсэн юм. Харин тус байнгын хорооны дарга Р.Сэддорж "Одоогоор ашиг сонирхлын зөрчилтэй гэж мэдэгдсэн УИХ-ын гишүүн байхгүй" гэв.

Хариулттай холбогдуулан УИХ-ын гишүүн Б.Энхбаяр "Нүүрсний хэрэгт татагдсан гэж мэдээлэл гарч байсан хүн байнгын хороог даргалаад сууж байна. Сонсгол дээр ч яригдсан. Стратегийн ордын хувь эзэмшдэг гишүүн ч манай танхимд байгаа" гэв.