Өвлийн сар дундаа орж хүйтний эрч чангарсан энэ үед томуу, томуу төст өвчний дэгдэлтийн нөхцөл байдлын талаар эрүүл мэндийн байгууллагууд урьдчилан сэргийлэх зөвлөгөө мэдээллийг долоо хоног бүр хүргэж байгаа. Хуваарийн дагуу өнөөдөр Нийслэлийн эрүүл мэндийн газар болон Халдварт өвчин судлалын үндэсний төв /ХӨСҮТ/-өөс мэдээлэл хийх юм байна.
ХӨСҮТ-ийн Томуугийн үндэсний төвийн тархвар судлаач эмч Ч.Уртнасангийн хэлснээр өнгөрсөн жилийн мөн үетэй харьцуулахад томуу, томуу төст өвчлөлийн тархалт болон хүндрэл нэмэгджээ. Иргэдийн дунд томуугийн H1N1, SARS-CoV-2, риновирус, аденовирус идэвхжил өндөртэй байгаа аж.
