СХД-ийн Эрүүгийн хэргийн анхан шатны шүүхэд Сэтгүүлч Э.Ганхуягийн амь насыг хөнөөсөн согтуу жолоочид холбогдох хэргийн гэм буруугийн шүүх хурал өнөө өглөө эхэлсэн.

Шүүх хуралд хохирогчийн ээж нь нэг өмгөөлөгчийн хамтаар оролцож байгаа бол шүүгдэгчийн өмгөөлөгч нь шүүх хуралд цахимаар оролцсон. Харин шүүгдэгчийн зүгээс "Шүүх хуралд хоёр өмгөөлөгчтэй оролцох хүсэлтэй байгаа тул шүүх хурлыг хойшлуулж өгнө үү" гэх хүсэлтийг гаргасан бол мөн түүний өмгөөлөгч шүүх хуралд биечлэн оролцох хүсэлт гаргасан.

Тэгвэл дөнгөж сая шүүх бүрэлдэхүүн дээрх хүсэлтийг хэлэлцээд ирэх 11-р сарын 8-ны 09:00 цаг хүртэл шүүх хурлыг хойшлуулах шийдвэр гаргалаа.

Хэргийг сануулахад, өнгөрсөн долоодугаар сарын 9-ний өдөр Сонгинохайрхан дүүргийн нутаг дэвсгэрт зам тээврийн ноцтой осол гарч, "Монголын радио"-ийн сэтгүүлч Э.Ганхуяг харамсалтайгаар амиа алдсан байдаг. Осол гаргасан жолооч нь согтолтын түвшин өндөр байсан гэх бөгөөд хууль хяналтын байгууллагаас шалгаж эхэлсэн юм.