Дархан цаазат Богдхан ууланд хууль бусаар тарвага агнасан хэргийг шалгаж байна. Тодруулбал,

Экологийн цагдаагийн албанаас энэ оны 09 дүгээр сарын 12-ны өдөр Дархан цаазат Богдхан уулын дархан цаазат газрын ойн сангийн бүсэд Хуш модны самрыг болц гүйцээгүй үед нь түүж байгаа хууль бус үйл ажиллагааг таслан зогсоох чиглэлээр хийгдсэн хяналт шалгалтын үеэр Налайх дүүргийн иргэн Б нь Тоз-8 маркийн галт зэвсэг ашиглан 1 тооны тарвага агнасан хэргийг илрүүлсэн байна.

Экологийн цагдаагийн албанаас тарваган тахал өвчнөөс урьдчилан сэргийлэх чиглэлээр холбогдох мэргэжлийн байгууллагуудтай хамтран энэ оны 08 дугаар сарын 07-ны өдрөөс Улаанбаатар хотыг тойрсон шалган нэвтрүүлэх товчоодод 24 цагаар хяналт шалгалт хийж байна.

Өнгөрсөн хугацаанд 30 мянга гаруй тээврийн хэрэгсэлд үзлэг шалгалт хийж 84 зөрчил илрүүлснээс орон нутгийн зорчигч болон ачаа тээврийн үйлчилгээ үзүүлдэг аж ахуй нэгж байгууллагын 10 автобуснаас хууль бусаар агнагдсан байж болзошгүй 33 ширхэг тарваганы эд эрхтэнг Улаанбаатар хот руу нэвтрүүлэхийг завдсан үйлдлийг илрүүлж, холбогдох шалгалтын ажиллагааг явуулж байна. Хяналт шалгалтаар илэрсэн зөрчлийг дахин давтан гаргуулахгүй байх, иргэдийн амь нас эрүүл мэндийг хамгаалах зорилгоор Авто тээврийн үндэсний төв төрийн өмчит үйлдвэрийн газарт болон гэрээгээр зорчигч тээврийн үйлчилгээ үзүүлдэг Өвөрхангай, Увс, Ховд аймгуудын авто тээврийн төвд гэмт хэрэг, зөрчлийн шалтгаан нөхцөлийг арилгуулах чиглэлээр АЛБАН МЭДЭГДЭЛ өгч, цаашид хот хоорондын зорчигч тээврийн автобусанд хууль бусаар зэрлэг ан амьтан агнасан, барьсан, тэдгээрийн гаралтай түүхий эд зүйлийг тээвэрлэхгүй байх, удаа дараа зөрчил гаргасан аж ахуй нэгжийн үйл ажиллагааг цуцлуулах хүртэл арга хэмжээ тооцуулахаар ажиллаж байна.