УИХ-ын сонгуулийн нэгдүгээр тойрогт нэр дэвшиж буй Г.Сайханбаярын ухуулагчаар ажиллаж байсан О нь Өвөрхангай аймгийн Сант сумын АН-ын дарга Б-гийн амь насыг хохироосон хэрэгт холбогдоод буй. Цагдаагийн байгууллагаас О-г яллагдагчаар татан, цагдан хориод байгаа юм.
Мөн МАН уг асуудалд ёсзүйн хариуцлага хүлээлгэж, нэр дэвшигч Г.Сайханбаярын нэрийг татах албан бичгээ СЕХ-нд хүргүүлсэн. Харин СЕХ-ноос нэгэнт батламж гардуулан өгсөн тул татах боломжгүй гэдгээ мэдэгдээд байгаа билээ.
Тэгвэл өнөөдөр сонгуультай холбоотой хэрэг зөрчлийн талаар ЦЕГ-аас мэдээлэл хийлээ. Энэ үеэр Мөрдөн байцаах албаны хэлтсийн дарга Б.Баттулга "Нэр дэвшигч Г.Сайханбаяраас "Намайг ухуулагч О-гийн хэрэгт холбогдуулан шалгасан эсэх"-т тайлбар өгөөч гэж хүссэн. Тиймээс "Тухайн нэр дэвшигчийг гэмт хэргийн оролцогч биш" гэх тайлбарыг нь өгсөн" гэх мэдээллийг өглөө.
