"Эрдэнэс Тавантолгой ХК"-ийн нэрийг ашигласан залилах гэмт хэрэг бүртгэгдэж байгаа талаар цагдаагийн байгууллагаас анхаарууллаа. Тодруулбал, энэ оны эхний таван сарын байдлаар "Эрдэнэс Тавантолгой ХК"-тай нүүрс худалдан авах гэрээ байгуулж өгнө гэж бусдын залилсан гэмт хэргийн талаарх 9 гомдол мэдээлэл цагдаагийн байгууллагад иржээ. Үүний 4-т нь хэрэг бүртгэлтийн хэрэг нээхээс татгалзсан. Харин 5-д нь хэрэг нээсэн байна. Шалгаж буй хэрэгт нийт 5-10 хүнийг холбогдуулан шалгаж байгаа аж.

Дээрх этгээдүүд нь аж ахуйн нэгжийн нүүрс худалдан авах гэрээний хүсэлт, холбогдох бичиг баримтыг хүлээн авч "Эрдэнэс Тавантолгой ХК"-ийн албан маягт, гарын үсэг, тамга тэмдгийг хуурамчаар үйлдэж, хуурамч цахим шуудангаар харилцаж их хэмжээний мөнгийг залилсан нөхцөл байдал тогтоогдоод байна.