Гурилыг импортын татвараас тэглэх, үнэ тогтворжуулахтай холбоотой асуудал өнөөдөр ч анхаарлын төвд маргаан дагуулсан хэвээр байна. Энэ асуудалд Үндэсний томоохон үйлдвэрлэгчдийн нэг “Алтан тариа” ХХК-ийн Гүйцэтгэх захирал П.Цэнгүүн “ам нээх”-ээс татгалзаж байсан бол саяхнаас мэдэгдэл гаргасан. Улмаар нэр хүндэд нь халдсан хүмүүсийг шүүхэд өгнө гэдгээ санууллаа. Тэрбээр твиттер хуудсаараа дамжуулан ЗГХЭГ-ын дарга Д.Амарбаясгалан болон “Ургац хүдэр” ХХК-ийн захирал Л.Цандэлэг нарт хандаж “Өмгөөлөгчтэйгөө зөвлөсний үндсэн дээр худал хуурмаг тарааж компанийн болон миний нэр хүндэд халдсан энэ 2 хүнийг эхний ээлжинд шүүхэд өгөхөөр шийдлээ. Шүүх дээр уулзацгаая. Баримтаа бэлдээрэй” гэжээ.