Өнөөдөр буюу арванхоёрдугаар сарын 18-ны өдөр Ардчилсан намын хорооноос цаг үеийн асуудлаар мэдээлэл хийлээ. Энэ үеэр Ардчилсан намын эмэгтэйчүүдийн холбооны тэргүүн Б.Жаргалан өөрийн байр сууриа илэрхийллээ.

Тэрбээр "Өнөөдрөөс эхлэн бага ангийн сурагчдийг цахим хэлбэрт шилжүүлж, автомашиныг тэгш, сондгой дугаараар зорчуулах хавтгайрсан шийдвэр гарлаа. Үүнтэй холбоотойгоор Ардчилсан эмэгтэйчүүдийн холбооны зүгээс МУ-ын Ерөнхий сайд Л.Оюун-Эрдэнэд шаардлага хүргүүлж байна. Учир нь МАН-ын ЗГ Нийслэлийн удирдлагын хариуцлагагүй үйл ажиллагаа олон удаагийн алдаатай шийдвэрүүд, иргэдийн амжиргаа , аюулгүй байдал ,эрүүл мэнд , ирээдүйд аюул учруулж байна. Эрх баригчид эрчим хүч, шатахууны хомслол , агаар болон хөрсний бохирдолд замын түгжрэл ,нийтийн тээврийн хүртээмж, боловсрол, эрүүл мэндийн салбарын уналт зэрэг төрийн бодлогоос шууд хамааралтай нийгмийн тулгамдсан асуудлыг шийдэх чадваргүй болох нь нотлогдлоо. Төрийн дарамт, төсвийн хулгай хэрээс хэтэрч үндсэн хуулиар баталгаажсан үнэт зүйлсэд заналхийлж байна. Мөн иргэдийн төрд итгэх итгэлийг үгүй хийж байна. Өчигдрийн гэнэтийн шийдвэр нь олон зүйлд сөргөөр нөлөөлж байгаа тул эдгээр асуудалд залруулга хийж урт хугацааны бодлого танилцуулахыг шаардаж байна" гэв.