"Ханжөү-2022" Азийн зуны XIX наадам БНХАУ-ын Ханжөү хотод болж байгаа билээ. Өнөөдрийн байдлаар Монголын баг тамирчид хоёр мөнгө, таван хүрэл медаль хүртэж, медалийн тоогоор 20 дугаар байрт бичигдэж байна.
Хийн урт бууны эмэгтэй баг болох О.Есүгэн, Ч.Нарантуяа, Г.Нандинзаяа нар 10 метрийн дасгалд хүрэл медаль хүртэж Монголын багийн медалийн салхийг хагалсан бол жүдо бөхийн төрөлд эрэгтэйчүүдийн 66 кг-ын жинд Ё.Басхүү, -100 кг-ын жинд Б.Гончигсүрэн нар мөнгө, 73 кг-ын жинд Ц.Цогтбаатар, эмэгтэйчүүдийн 52 кг-ын жинд Л.Сосорбарам , +78 кг-ын жинд А.Адьяасүрэн нар хүрэл, мөн жүдо бөхийн холимог багийн төрөлд Монголын баг хүрэл медаль тус тус хүртжээ.
