Архангай аймгийн Хашаат сумын Жаргалант багийн Дэлийн-Өвөр гэдэг газар /аймгийн төвөөс зүүн урд зүгт 167 км-т, сумын төвөөс зүүн хойд зүгт 5 км-т/ наймдугаар сарын 13-ны өдрийн 22:55 цагийн орчим хүчтэй аадар бороо орж, 27 м/с хүчтэй шороон шуурга шуурсаны улмаас “Хархорин А, Б” 110 кВт-ын цахилгаан дамжуулах агаарын шугамын 679-683 дугаар (5 ш) тулгуур багана унаж Архангай, Баянхонгор, Өвөрхангай аймгийн нийт 54 суманд цахилгаан тасарсан.

Үүн дагуу “Цахилгаан дамжуулах үндэсний сүлжээ” ТӨХК-ийн Улаанбаатар хот, Архангай, Орхон, Өвөрхангай аймаг дахь салбаруудын нийт 80 ажилтан, 24 техниктэйгээр сэргээн босгох ажлыг зохион байгуулж, наймдугаар сарын 15-ны өдрийн 17:34 цагт гэмтлийг бүрэн устгаж, цахилгаан эрчим хүчээр хязгаарлагдаад байсан Архангай, Баянхонгор, Өвөрхангай аймгийг цахилгаан эрчим хүчинд холбож, хэвийн горимд оруулсан байна.