БНХАУ-ын нийслэл Бээжин хотод 2023 оны долоодугаар сарын 29-ний өдрөөс эхлэн үргэлжлэн орсон бороотой холбоотойгоор Бээжин хотын Ус судлалын ерөнхий газраас 2023 оны долоодугаар сарын 31-ний өдөр “Улаан түвшин”-ий сэрэмжлүүлэг гаргаж, гол, мөрний ай сав газар амарч, зугаалахгүй байх анхааруулга өгсөн билээ.
Тус борооны улмаас Бээжин хот үерт автаж, 20 хүн амиа алдаж, 27 хүн сураггүй болжээ. Синьхуа агентлагийн мэдээлснээр Бээжин хотын 11 иргэн, Хэбэй мужийн есөн иргэн амиа алдсан гэв. Мөн тус хотын Фаншан дүүрэгт 60 мянга гаруй айлын цахилгааныг таслаад байгаа аж. Эрсдэл өндөртэй бүсэд байрлах 125 мянган иргэнийг аюулгүй бүс рүү нүүлгэн шилжүүлжээ.
