Эрүүл мэндийн яамнаас коронавирусний халдварын нөхцөл байдал, тархалтын талаарх ээлжит мэдээллээ хийлээ.
ХӨСҮТ-ийн захирал Д.Нямхүү: Өчигдөр ХӨСҮТ-ийн 2, Дархан-Уул аймгийн нэг лабораторид нийт 216 хүнд коронавирусний шинжилгээ хийснээс 215 иргэнд коронавирус илрээгүй. Харин нэг хүний сорьцонд коронавирус илэрлээ.
Зургадугаар сарын 10-ны өдөр Нур-Султан-УБ чиглэлийн тусгай үүргийн онгоцоор ирсэн нэг хүний гурав дахь удаагийн давтан шинжилгээнд коронавирус илэрлээ.
Тус иргэнд эхлээд 6 зургадугаар сарын 11-нд шинжилгээ хийхэд сөрөг гарсан, 22-ны өдөр давтан шинжилгээ хийхэд мөн сөрөг гарсан. Харин 29-ны өдрийн шинжилгээний хариунд коронавирус илэрлээ. Үндсэндээ 19 хоногийн дараа илэрсэн гэсэн үг. Ер нь бол Нур-Султан-УБ чиглэлийн онгоцоор ирсэн нийт 10 хүнд коронавирус илрээд байна.
Түүнчлэн ажиглах байранд тусгаарлагдсан 181 хүний давтан шинжилгээ, тандалтын 2 сорьцонд шинжилгээ хийхэд коронавирус илрээгүй. Мөн Алтанбулагийн боомтоор орж ирсэн 14 хүний сорьц, Сэлэнгэ аймагт тусгаарлагдсан 4 хүний давтан шинжилгээ хийхэд коронавирус илрээгүй.
Ингээд МУ-д батлагдсан тохиолдол нийт 220 боллоо. Үүнээс 175 иргэнийг эмчилж эдгээсэн. Одоо 45 хүн эмчилгээнд байна. Биеийн байдлын хувьд хөнгөн 36, хүндэвтэр 9 хүн байна.
