"The HU" хамтлаг цар тахлын үед ажиллаж буй УОК-ийн үйл ажиллагаанд хандив өргөх тоглолтоо зургадугаар сарын 24-нд зохион байгуулах байсан ч түр хугацаагаар хойшлуулаад байсан юм. Харин тус тоглолт энэ ням гарагт буюу зургаадугаар сарын 28-ны 22:00 цагт White Rock Center-т зохион байгуулагдахаар болжээ. 

Уг хандивын  тоглолтыг МҮОНТ-ээр орон даяар шууд дамжуулан хүргэх юм. Хоёр цаг гаруй хугацаанд үргэлжлэх тоглолтын үеэр үзэгчид, ард иргэд мөнгөн хандиваа ХААН банкны данс болон Candy данс руу шилжүүлэх боломжтой. Тоглолтын хугацаанд цугларсан хандивыг COVID-19 халдвараас урьдчилан сэргийлэх үйл ажиллагаанд зориулж Улсын Онцгой комисст хандивлана. 

"The HU" хамтлаг нь тус тоглолтоо "COVID-19"-ийн эсрэг амжилттай тэмцэж, ард иргэдээ хамгаалж буй хүмүүст талархан, иргэн бүр хариуцлагатай байх нь чухал энэ цаг үед урьдчилан сэргийлэх, хамгаалах ажиллагааг сулруулахгүй, сонор сэрэмжээ алдахгүй байхыг нийт монголчууддаа сануулж уг тоглолтыг зохион байгуулж байгаа аж.