Засгийн газар унадаг дугуйн болон явган хүний замын зураг төсвийн ажлыг эхлүүлэх хөрөнгийг шийдвэрлэсэн. Энэ жил шинээр зөвхөн хотын төв дотор 23 байршилд 55 км дугуйн зам, найман байршилд 2,9 км гаруй дугуйн гүүрэн замын бүтээн байгуулалтын ажлыг эхлүүлэх төлөвлөгөө гарсан.

Улаанбаатарчуудын 1.2 хувь нь унадаг дугуйгаар зорчдог гэх судалгаа гарчээ. Түүнчлэн унадаг дугуйн хэрэглээг нэмэгдүүлж, зорчих зам, дэд бүтцийг сайжруулснаар түгжрэл хотын төвд 12500 машинаар, хотын зах руу 22 мянган машинаар буурах боломжтой тооцоо гарсан аж. Өөрөөр хэлбэл тодорхой бүсэд 9.1-13 хувиар түгжрэл буурах тооцоолол байгаа юм.