АТГ-аас нүүрсний гэх тодотголтой авлига, албан тушаалын гэмт хэрэгт УИХ-ын гишүүн Т.Аюурсайхан, Н.Наранбаатар, “Ажнай” Д.Бат-Эрдэнэ нарыг яллагдагчаар татсан. Улмаар өнгөрсөн долоо хоногт АТГ-аас эдгээр гурван гишүүний бүрэн эрхийг түдгэлзүүлэх саналыг прокурорын байгууллагад хүргүүлэхээр болсон билээ. Тэгвэл УЕП Б.Жаргалсайхан гадаад томилолтой байсан тул АТГ-аас хүсэлтээ хүргүүлээгүй бөгөөд Б.Жаргалсайхан прокурорыг ирсний дараагаар 2023 оны 03 дугаар сарын 22-ны өдөр хүргүүлсэн.

Тэгвэл эх сурвалжийн мэдээлж буйгаар УЕП Б.Жаргалсайхан гурван гишүүний бүрэн эрхийг түдгэлзүүлэх саналыг өнөөдөр үдээс хойш УИХ-ын дарга Г.Занданшатарт гардуулсан гэх мэдээлэл байна.

Хуулийн дагуу Гишүүний бүрэн эрхийг түдгэлзүүлэх эсэх асуудлыг УИХ-ын гишүүний халдашгүй байдлын дэд хороо, Хууль зүйн байнгын хороо, Төрийн байгуулалтын байнгын хорооны санал, дүгнэлтийг үндэслэн, нэгдсэн хуралдаанаар хэлэлцэж, Төрийн байгуулалтын байнгын хорооны саналаар нууцаар санал хурааж шийдвэрлэнэ.

Г.Лхагвадорж