Цаг агаарын нөхцөл байдлаас үүдэн Дорнод аймгийн Баян-Уул сумын харьяат малчин Г /54 настай, эрэгтэй/ болон Хэнтий аймгийн Өмнөдэлгэр сумын харьяат малчин Г /61 настай, эрэгтэй/ нар малаа хариулахаар гараад сураггүй алга болж улмаар нас барсан байдалтай олдсон харамсалтай хэрэг гарчээ.
Тодруулбал, Дорнод аймгийн Баян-Уул сумын Урт багийн харьяат малчин Г-нь гуравдугаар сарын 21-ний өдрийн 17:00 цагт явганаар малаа хариулж яваад сураггүй алга болсон байна.
Энэ тухай дуудлага мэдээлэл тухайн өдрийн 19:42 цагт ОБГ-т ирсэн бөгөөд тус аймгийн Онцгой байдлын газрын Баян-Уул сум дахь Гал түймэр унтраах, аврах 53 дугаар анги, Хилийн цэргийн 0275 дугаар ангийн алба хаагчид, Баян-Уул сумын мэргэжлийн ангийнхан, орон нутгийн иргэд, ар гэрийнхэн гуравдугаар сарын 22-ны өдрийн 07:25 цагаас малчин Г /54 настай, эрэгтэй/-ийг эрэн хайх ажиллагааг зохион байгуулж, мөн өдрийн 16:40 цагт гэрээс нь урд зүгт 4 км-ын зайтай тус сумын Урт багийн “Дарьхантын гол” гэдэг газраас тухайн малчны цогцсыг олж, ар гэрийнхэнд нь шилжүүлэн өгсөн байна.
Мөн Хэнтий аймгийн Өмнөдэлгэр сумын харьяат малчин Г /61 настай, эрэгтэй/ нь гуравдугаар сарын 21-ний өдрийн 17:00 цагийн орчим мотоциклтой малаа хариулж яваад сураггүй болсон тул тус сумын мэргэжлийн ангиас эрэн хайх ажиллагааг зохион байгуулж, гуравдугаар сарын 22-ны өдрийн 10:21 цагт тухайн малчны цогцсыг олсон байна.
